મુંબઈ 19, જાન્યુઆરી
અભય દેઓલ અને સોનમ કપૂર 'આઇશા' બાદ ફરી એકવાર સિલ્વર સ્ક્રીન પર સાથે જોવા મળશે. આ બન્નેની જોડી રાજકુમાર સંતોષીની આગામી રોમેન્ટિક ફિલ્મમાં ચમકશે. આ ફિલ્મનું શૂટિંગ પહેલી ફેબ્રુઆરીથી શરૂ થશે. સોનમ અને અભય પ્રથમ વખત સંતોષી જેવા મોટા ગજાના ફિલ્મનિર્દેશક સાથે કામ કરી રહ્યાં છે. એમ માનવામાં આવે છે કે સંતોષી પહેલાં 'અજબ પ્રેમ કી ગજબ કહાની'ની સિક્વલ બનાવવા ઇચ્છતા હતા પરંતુ તે માટે તેમને કેટરિના અને રણબીરની ડેટ્સ મળી શકી ન હતી.
આ જ કારણસર તેમણે હવે અભય અને સોનમને લઇને એક રોમેન્ટિક ફિલ્મ બનાવવાનો નિર્ણય કર્યો છે. સોનમ પાસે હવે મોરાં બેનરોની ફિલ્મો આવી રહી છે. મળેલી માહિતી મુજબ, સોનમની ફ્લોપ થતી ફિલ્મોથી ચિંતિત તેના પિતા અનિલ કપૂરે જ રાજકુમાર સંતોષીને આ ફિલ્મમાં સોનમ કપૂરને લેવા કહ્યું હતું અને સંતોષી અનિલની વાત માની ગયા હતા, કેમ કે બન્ને વચ્ચે ખૂબ સારા સંબંધ છે. અનિલ કપૂર અને રાજકુમાર સંતોષી 'પુકાર' અને 'લજ્જા' જેવી ફિલ્મોમાં સાથે કામ કરી ચૂક્યા છે, બીજી તરફ દેઓલ પરિવાર સાથે પણ સંતોષી ખૂબ સારા સંબંધ ધરાવે છે.