નવી દિલ્હી 3, એપ્રિલ
ઈન્કમટેક્સ રિટર્ન સાથે હવે તમારે વિદેશી બેંકોમાં રાખવામાં આવેલી સંપતિ અને વિદેશી બેંકોમાં ખોલવામાં આવેલાં ખાતાની માહિતી આપવી પડશે. સરકારે કાળું નાણું વધાવાનાં મુદ્દે વિદેશી બેંકો અને વિદેશી સંપતિની વિગત આપવા માટેની વ્યવસ્થા ઈન્કમટેક્સ રિટર્ન ફોર્મમાં કરવામાં આવી છે.
નાણાંકીય વર્ષ 2012-13 નાં આઈટી રિટર્ન ફોર્મમાં તેના માટે અલગથી જગ્યા કરવામાં આવશે. એવા કરદાતાઓ કે જેમનાં વિદેશી બેંકોમા ખાતા છે અને વિદેશી સંપતિમાં પોતાનું રોકાણ ધરાવે છે, તેમણે આ ફોર્મમાં તેની વિગત ફરજિયાત આપવી પડશે.
જે તે દેશની બેંક હોય તે બેંકનું નામ અને તે દેશનું નામ તેમજ એક વર્ષ દરમિયાન બેંકનાં ખાતામાં જમા કરાવવામાં આવેલી રકમની વિગત આ ફોર્મમાં ભરવી પડશે. વિદેશની કોઈ કંપનીમાં જો રોકાણ કર્યું હોય તો તેની વિગત પણ આપવી પડશે. જે તે કરદાતાએ વિદેશી બેંકમાં ચાલતી હોય તે સહી પણ ફોર્મમાં કરવી પડશે.