બર્લિન, 6 એપ્રિલ
હિન્દી ફિલ્મોમાં ઘણી વાર આ પ્રકારના ભાવુક દૃશ્ય જોવા મળે છે જેમાં કેટલાક વર્ષો પછી ખોવાયેલા ભાઇ-ભાઇ કે મા-દિકરો એક બીજાને બાળપણની કોઇ નિશાની વડે ઓળખી લે છે. અહીં પણ કંઇક એવું જ થયું છે. એક મહિલાને 16 વર્ષ પહેલા ખોવાયેલી તેની બિલાડી પોલડી મળી આવી હતી.
મ્યુનિક નજીક રહેતા એક પરિવારને જંગલમાંથી એક બિલાડી મળી આવી હતી. તે ઘણી વૃદ્ધ થઇ ગઇ હતી અને તેના આગળના દાંત પડી ગયા હતા. શોકોટેલ પરિવાર આ બિલાડીને ઘરે લઇ આવ્યો અને તેની સારવાર કરી હતી. આ દરમ્યાન તેમણે જોયું કે પોલડીના કાનની પાછળ એક યુનિક આઇડીફિકેશન નંબર હતો. આથી તેમને આ જાણકારી એક જાનવર સુરક્ષા કરનારી સંસ્થાને આપી અને આ સંસ્થાએ આ બિલાડીના માલિકને શોધી લીધી.
બિલાડીની માલિક કોશેનબેચે જણાવ્યું હતું કે પોલડી 1996માં ગુમ થઇ ગઇ હતી. તેણે ક્યારેય ધાર્યું ન હતું કે તેમને આટલા વર્ષો પછી તેમની ખોવાયેલી બિલાડી મળી આવશે.