'વોગ'માં ૧૬ વર્ષથી નાની મોડલ્સ નહીં દેખાય

જાણીતા ફેશન મેગેઝિન 'વોગ'ની તમામ ૧૯ એડિશનોના એડિટર્સે બોડી ઇમેજ અંગેનો ફેશનનો અભિગમ બદલવાના પ્રયાસરૃપે તેમનાં મેગેઝિનમાં ૧૬ વર્ષથી નાની મોડલ્સના ફોટોગ્રાફ્સ કે લેખ પ્રકાશિત નહીં કરવાની એક સમજૂતી કરી છે.

આ એડિટર્સમાં ૨૦૧૦માં ૧૦ વર્ષની એક બાળકીનું ફોટોસ્પ્રેડ છાપીને વિવાદ સર્જનારા 'વોગ'ની પેરિસ એડિશનનાં ઇમેન્યુલી ઓલ્ટ અને ફ્લેગશિપ યુએસ એડિશનનાં એના વિન્ટૌર સહિતના એડિટર્સનો સમાવેશ થાય છે. 'વોગ' મેગેઝિન પ્રકાશિત કરતી કંપની કોન્ડે નાસ્ટ ઇન્ટરનેશનલના ચેરમેન જોનાથન ન્યૂહાઉસે કહ્યું હતું કે, 'વોગ' મેગેઝિનનું માનવું છે કે સારું સ્વાસ્થ્ય એ જ સુંદરતા છે. મેગેઝિનના દુનિયાભરના એડિટર્સ એમ ઇચ્છે છે કે મેગેઝિન મોડલ્સની હેલ્થ માટેની પોતાની કટિબદ્ધતા પ્રતિબિંબિત કરે.

'વોગ'ના જૂન મહિનાના અંકમાં પણ પ્રકાશિત થનારી એડિટર્સની ૬ મુદ્દાની સમજૂતીમાં તેમણે ૧૬ વર્ષથી નાની કે 'ઇટિંગ ડિસઓર્ડર' ધરાવતી મોડલ્સ સાથે કામ નહીં કરવાનો નિર્ધાર કર્યો છે. એડિટર્સે ઉમેર્યું હતું કે, "અમે એવી મોડલ્સ સાથે જ કામ કરીશું કે જે અમારા મતે તંદુરસ્ત હોય અને હેલ્ધી બોડી ઇમેજ પ્રમોટ કરવામાં અમને મદદરૃપ થાય."

એડિટર્સ મોડલિંગ એજન્સીઓને પણ સૂચના આપશે કે તેઓ અન્ડરએજ મોડલ્સ ન મોકલે. કાસ્ટિંગ ડિરેક્ટર્સને પણ ફોટોશૂટ પૂર્વે મોડલ્સના આઇડી પ્રૂફ ચેક કરવા જણાવાશે.

દરમિયાન, સારી ર્વિંકગ કન્ડિશન્સ માટેની ઝુંબેશના ભાગરૃપે ગત ફેબ્રુઆરીમાં રચાયેલા ન્યૂયોર્કસ્થિત ફેશન મોડલ્સના 'ધ મોડલ અલાયન્સ'એ 'વોગ'ના એડિટર્સની સમજૂતીનું સ્વાગત કર્યું છે અને આશા વ્યક્ત કરી છે કે અન્ય મેગેઝિન્સ પણ આ પ્રકારની સમજૂતી કરશે, કેમ કે કોઇ મોડલ અન્ડરએજ હોય તો તેનું નાણાકીય શોષણ થવાનું જોખમ રહે છે, તે ઉપરાંત ઇટિંગ ડિસઓર્ડર અને શાળાકીય અભ્યાસમાં અવરોધ જેવી સમસ્યાઓ પણ રહે છે.