મહેસાણા, તા.૫
મહેસાણામાં હૈદરીચોક વિસ્તારમાં મોટી વ્હોરવાડ ખાતે રહેતા અને મહેસાણા એસટી ડિવિજનમાં ડ્રાયવર તરીકે ફરજ બજાવતા ફકીરમહંમદ અબ્દુલકાદર વ્હોરા મંગળવારે બપોરે ૧-૩૦ કલાકે એસ.ટી.બસ થઈ જગુદણ ગયા હતા. જગુદણથી મહેસાણા તરફ આવતાં એક જીપ ચાલક રોન્ગ સાઈડમાં આવતો હોવાથી તેમણે ઠપકો આપ્યો હતો અને વાહન બરાબર ચલાવવા માટે જણાવ્યું હતું. આથી રોન્ગ સાઈડમાં આવતી જીપ નંબર જીજેર૪એ ૩૭૦નો ચાલક તેમજ તેમાં બેઠેલો એક અન્ય શખસ ઉશ્કેરાયા હતા. તેમણે જીપ ઉભી રાખી હતી અને એસટી ચાલક ફકીરમહંમદ વ્હોરાને ગાળો બોલી હુમલો કર્યા હતો. લોખંડની પાઈપથી એસટી ડ્રાયવર ઉપર હુમલો કરવામાં આવ્યો હતો. એસટીના ડ્રાયવરે આ ઘટના અંગે મહેસાણા તાલુકા પોલીસ મથકમાં ફરિયાદ નોંધાવતાં પોલીસે સરકારી નોકર ઉપર હુમલો કરવાના આરોપમાં બે શખસો સામે ફરિયાદ નોંધી હતી.