માર્ક ઝુકરબર્ગનો સલમાનખાનના સ્વાંગમાં દેખાયો

ફેસબુક જ્યારે તેના યૂઝર્સના પ્રાઇવસી સેટિંગને લઈને આલોચનાનો સામનો કરી રહી છે ત્યારે ફરી એકવાર આ સાઇટ પર પ્રાઇવસી અંગેની મોટી ખામી જોવા મળી છે. આ વખતના બનાવમાં ફેસબુકના સીઈઓ માર્ક ઝુકરબર્ગનો શર્ટ પહેર્યા વિનાનો ફોટો અપલોડ થઈ જતાં નેટ પર લીક થઈ ગયો હતો.

કંપનીના સીઈઓ માર્ક ઝુકરબર્ગનો ફોટો અકસ્માતે જ સોશિયલ નેટર્વિંકગ સાઇટ ફેસબુક પર પોસ્ટ થઈ ગયો હતો. ફોટામાં ઝુકરબર્ગે શર્ટ પહેર્યો નથી અને તે હળવાશની પળો માણતો હોય તેમ લાગી રહ્યું છે. નવપરિણીત ઝુકરબર્ગ ફોટામાં બીજા અન્ય યુવાનો સાથે છે અને તે યુવાનોએ પણ શર્ટ પહેર્યાં નથી. ફેસબુક પર હંમેશાં પ્રાઇવસીને લઇને ફરિયાદ થતી રહી છે, આ વખતે તો ખુદ સીઇઓનો જ ફોટો લીક થઇ ગયો છે.

સૂત્રોના જણાવ્યા પ્રમાણે ફેસબુકના ડિરેક્ટર ઓફ એન્જિનિયરિંગ એન્ડ્રુ બોસવર્થ દ્વારા અકસ્માતે ફેસબુક પર અપલોડ થઈ ગયો હતો. બાદમાં તેણે માત્ર સેકન્ડોમાં જ ફોટાને સાઇટ પરથી હટાવી દીધો હતો, જો કે આટલા ટૂંકા સમયમાં પણ કોઈએ આ ફોટાને ઝડપી લઈને ઇમેજ સેરિંગ સાઇટ ઇમગુર પર અપલોડ કરી દીધો હતો. બાદમાં આ ફોટો ઇન્ટરનેટ પર ઝડપથી ફેલાઈ ગયો હતો.

તાજેતરમાં જ ફેડરલ ટ્રેડ કમિશને ફેસબુકને આદેશ આપ્યો હતો કે કંપનીએ રેગ્યુલર ૨૦ વર્ષ સુધી પ્રાઇવસી સેટિંગનું ચેકિંગ કરવું પડશે તેમજ ફેસબુકને આ મામલે અન્ય દંડ પણ ફટકાર્યો હતો. ફોટો અકસ્માતે જ લીક થતાં ખુદ ઝુકરબર્ગ જ તેની વેબમાં ફસાયો છે.