ચંડીગઢ, તા. ૨૧
- દિલ્હીમાં સિઝનનો સૌથી વધુ વરસાદ, ૨૪ કલાકમાં ૫૪.૫ એમએમ વરસાદ
- હરિયાણા, પંજાબના મોટાભાગના વિસ્તારોમાં વરસાદ
દિલ્હીમાં સોમવારે રાતથી શરૂ થયેલા ભારે વરસાદને લીધે ઠેર ઠેર પાણી ભરાતાં અને ટ્રાફિકજામની સમસ્યાને લીધે હજારો લોકોને હાલાકી થઈ હતી. હવામાન વિભાગના જણાવ્યાનુસાર, શહેરમાં ૨૪ કલાકમાં ૫૪.૫ એમએમ વરસાદ નોંધાયો હતો. ચાલુ સિઝનમાં દિલ્હીમાં અત્યાર સુધીનો સૌથી વધુ વરસાદ નોંધાયો છે. સોમવારે રાતથી શરૂ થયેલા વરસાદનું જોર સવારે ઓછું થયું હતું ત્યાર પછી સાંજ સુધીમાં વધુ ૨૮.૨ એમએમ વરસાદ પડયો હતો.
બીજી તરફ હિમાચલપ્રદેશમાં ભારે વરસાદને લીધે ભૂસ્ખલનની ઘટનાઓમાં બેનાં મોત થયાં હતાં. રાજ્યમાં ભારે વરસાદને લીધે હાઇડ્રો-પાવર પ્રોજેક્ટ પણ બંધ થઈ ગયા છે. તો છેલ્લા કેટલાક દિવસથી હરિયાણામાં પડી રહેલા ભારે વરસાદ વચ્ચે મંગળવારે પંજાબના અન્ય ભાગોમાં પણ વરસાદ પડતાં રાજ્યમાં તાપમાનનો પારો પાંચથી સાત ડિગ્રી નીચે ઊતર્યો હતો જ્યારે ઉત્તર ભારતમાં હરિયાણા અને સોનપતમાં સૌથી વધુ ૧૫૧ એમએમ, ભિવાનીમાં ૧૧૨ એમએમ અને રોહતકમાં ૮૩.૪ એમએમ, ગુરગાંવમાં ૨૦, નર્નુલમાં ૫૨, કરનાલમાં ૨૨.૪, હિસારમાં પાંચ, અંબાલામાં ૧૨, પંચકુલામાં ૫૦ તથા પાનિપતમાં ૪૦ એમએમ વરસાદ નોંધાયો હતો.
આ પહેલાં સોમવારે ચંડીગઢમાં ૧૦૦ એમએમ વરસાદ નોંધાયો હોવાનું હવામાન વિભાગે જણાવ્યું હતું. પંજાબના પટિયાલામાં ૯.૮, લુધિયાણામાં ૩૦.૫, મોહાલીમાં ૭૦ અને રોપરમાં ૧૨ એમએમ વરસાદ પડયો હતો. ચંડીગઢમાં વરસાદે માજા મૂકતાં મહત્તમ તાપમાન સામાન્ય કરતાં છ ડિગ્રી સેલ્સિયસ નીચે જતાં ૨૭.૫ ડિગ્રી સેલ્સિયસ નોંધાયું હતું.