વડોદરા :
આજે દિવસભર વાદળછાયા માહોલ વચ્ચે તાપમાનમાં વધારો થયો હતો જેના કારણે બફારામાં પણ વધારો થયો હતો. પ્રકૃતિ તેના ટાઇમ ટેબલ મુજબ કામ કરે છે.
ભાદરવાના પ્રારંભ સાથે જ હવામાને પણ ફેરફારો ચાલુ કરી દીધા છે. છેલ્લા ૪ દિવસથી ચોમાસુ વિદાયના મૂડમાં હોય તેવો માહોલ જોવા-અનુભવવા મળી રહ્યો છે. આજે આકાશે વાદળોની હાજરી જરૂર હતી પરંતુ છૂટા છવાયા હોવાના કારણે ધૂપછાવ જોવા મળતું હતું. આકાશે સૂર્યનારાયણ વાદળોથી ઢંકાયેલા રહ્યાં હોવા છતાં આજે તાપમાનમા એક ડિગ્રી જેટલો વધારો થયો.
ભેજનું પ્રમાણ પણ આજે ૬૦ ટકાથી ઉપર રહ્યું હોવાથી બફારો અનુભવાતો હતો. જો કે સાંજે ઠંડા પવનની લહેરખીઓએ વાતાવરણ સાનુકુળ બનાવી દીધું હતું.
આજે શહેરમાં મહત્તમ તાપમાન ૩૩.૫ ડિગ્રી અને લઘુત્તમ તાપમાન ૨૫.૨ ડિગ્રી નોંધાયું હતું. ભેજનું પ્રમાણ ૬૨ ટકા અને હવાનું દબાણ ૧૦૫.૮ મિલિબાર રહ્યું હતું.