મુંબઇ
બીજી નવેમ્બરે એશા દેઓલના જન્મદિને લોન્ચ થનારી તેની કમબેક ફિલ્મ ‘ટેલ મી ઓ ખુદા’માં હેમામાલિની તેની માતા બની છે જ્યારે તેના પિતાના રોલમાં પણ ધર્મેન્દ્ર જ જોવા મળે તેવી પ્રબળ શક્યતા છે.
‘ટેલ મી ઓ ખુદા’ હોલિવૂડની હિટ ફિલ્મ ‘મમ્મા મિયા’થી પ્રેરિત હોવાનું કહેવાય છે અને એશાના પિતાના રોલ માટે હેમાની પહેલી પસંદ તેના જૂના મિત્ર અને સાથી અમિતાભ બચ્ચન હતા પરંતુ દિગ્દર્શક મયુર પુરીએ આ ફિલ્મ માટે ‘બિગ બી’નો સંપર્ક કર્યો ત્યારે પોતે નવી ફિલ્મો સાઇન કરી રહ્યા નથી, તેવું જણાવી તેમણે ઓફરનો વિનમ્રપણે અસ્વીકાર કર્યો હતો.
છેવટે હેમાએ પતિ ધર્મેન્દ્રની મદદ માંગી છે અને ધરમજી આ પ્રોજેક્ટ માટે હા કહેવાની તૈયારીમાં હોવાનું મનાય છે. તેમ થયું તો ધર્મેન્દ્ર-હેમા ૨૮ વર્ષ બાદ સાથે જોવા મળશે. છેલ્લે બન્ને ૧૯૮૧માં આવેલી ફિલ્મ ‘આસપાસ’માં સાથે દેખાયાં હતાં. ધર્મેન્દ્ર-હેમાની જોડીએ ૧૯૭૦ અને ‘૮૦ના દાયકા દરમિયાન ૪૨ ફિલ્મોમાં સાથે કામ કર્યું હતું અને તેમાંથી મોટા ભાગની ફિલ્મો સુપરહિટ રહી હતી.
બીજી નવેમ્બરે ‘ટેલ મી ઓ ખુદા’નું મુહૂર્ત થયા બાદ તુર્કીમાં શૂટિંગ શરૃ થશે. ફિલ્મના અન્ય કલાકારોમાં રિશી કપૂર, સંજય દત્ત અને ‘તેરે સંગ’ ફેઇમ રૃસલાન મુમતાઝનો સમાવેશ થાય છે.