મુંબઇ, તા.૩૦
મુંબઈના વાડાના કુડુસ ગામમાં પોલીસે મોબાઈલની દુકાન ચલાવનાર એમએનએસના નેતા રૃક્શાદ શેખની ધરપકડ કરી છે. મહિલાઓના મોબાઈલ ફોન ઉપર અશ્લીલ સંદેશાઓ મોકલવાના મામલામાં તેની ધરપકડ કરવામાં આવી છે. પોલીસ સૂત્રોએ કહ્યું છે કે રૃક્શાદ નામના શખસ પાસે લોકો મોબાઈલ સીમકાર્ડ રિચાર્જ કરાવવા માટે આવે છે. જેથી તેની પાસે તમામના નંબર આવી જાય છે. આમાંથી મહિલાઓના નંબર અલગ રીતે લઈ લીધા બાદ તે અશ્લીલ એસએમએસ સંદેશાઓ મોકલી રહ્યો હતો. પોલીસે ચોક્કસ બાતમી બાદ આ શખસને પકડી પાડવામાં સફળતા મેળવી છે.
અશ્લીલ એસએમએસ આવ્યા બાદ મહિલાએ પોતાના પતિને આ અંગેની જાણ કરી હતી ત્યાર બાદ બંનેએ વાડા પોલીસ સ્ટેશનમાં આ સંબંધમાં ફરિયાદ દાખલ કરી હતી. પતિ-પત્નીની સાથે ગામની ભાજપ મહિલા સંગઠનની મહિલાઓ પણ હતી. આ સંગઠનની એક મહિલા શુભાંગી ઉતેકરે કહ્યું હતું કે રૃક્શાદ શેખ મહારાષ્ટ્ર નવનિર્માણ સેનાનો સભ્ય છે. જેથી પોલીસ શરૃઆતમાં તેની સામે ફરિયાદ દાખલ કરવા માટે પણ તૈયાર ન હતી પરંતુ લોકોના દબાણ અને નારાજગીને ધ્યાનમાં લઈને આખરે ફરિયાદ દાખલ કરવામાં આવી હતી અને રૃક્શાદની ધરપકડ કરાઈ હતી. નારાજ લોકોએ એમએનએસ ઓફિસની નજીક તોડફોડ પણ કરી હતી.
અશ્લીલ મેસેજ મોકલવાના મામલામાં એમએનએસ નેતાની ધરપકડ કરાયા બાદ મુંબઈના પ્રાદેશિક પક્ષના કાર્યકરોમાં નારાજગીનું મોજું ફરી વળ્યું છે.